ससुराको किरियाबस्न घर फर्किएकी मेनुका बाटैमा अस्ताइन

काभ्रे ।
काभ्रे बेथानचोक १ च्याम्राङ्गबेशीमा सुसुराको निधन पछि माइतीमा रहेकी बुहारी किरिया बस्न घर फर्कने क्रममा बिच बाटोमै दुर्घटनामा परि निधन भएको छ ।

काभ्रेको बेथानचोक गाउँपालिका वडा नं १ का भीम प्रसाद गौतमको शनिवार बिहान घरमै निधन भएको थियो । गौतमकी साहिँली बुहारी मेनुका गौतम मकवानपुर हेटौंडा माइतीमा थिइन् । गौतमको निधन पछि उनी आइतबार ससुराको किरिया गर्नका लागि घर फर्कर्ने क्रममा उनको बिच बाटोमै निधन भएको हो ।

मकवानपुरको फापरबारी सम्म सार्वजानिक बसमा आएकी उनले ललितपुर हुँदै काभ्रेसम्म पुग्नका लागि जेठाजूका छोरा (भतिजा)लाई बोलाइ उनले चलाएको मोटरसाइकलमा घर फर्कर्दै गरेको बुझिएको छ । अपरान्ह ४ बजेको समयमा मोटरसाइकलमा गुडीरहेकै बेला गौतमले ओडोको सल बाइकको चेनमा अड्किए पछि उनी सलमा बेरिएर सडकमा खसेको बताइएको छ । उनको घटनास्थलमै मृत्युभएको थियो । ललितपुर बागमती गाउँपालिका वडा नं ७ दोर्जलिङ्गमा उक्त घटना भएको प्रहरीले जनाएको छ ।

महाँकाल गाउँपालिका वडा नं ६ का वडा अध्यक्ष विनोद चौरेलले मृतक मेनुकाको शव अहिले घटनास्थलमै रहेको गिम्दी प्रहरी घटनास्थलमा मै उपस्थित भएपनि नेपाल प्रहरी चापागाउँ बृत्तबाट प्रहरीको उपस्थिति पछि आवश्यक प्रक्रिया अगाडि बढाइने जानकारी दिए ।