पनौती/ पनौती साहित्य समाजको आयोजनामा हालै बडादशैँको अवसरमा शुभकामना आदानप्रदान, विशेष कविता वाचन तथा निबन्ध प्रतियोगिताका विजयी विद्यार्थीहरूलाई पुरस्कार वितरण कार्यक्रम सम्पन्न भएको छ । वरिष्ठ साहित्यकार सूर्यप्रसाद लाकोजूको प्रमुख आतिथ्यमा सम्पन्न कार्यक्रममा काभ्रेका पाँच स्थापित कविहरू दुईकाजी ताम्राकार, ध्रुव कृष्ण ताम्राकार, पुरुषोत्तम ताम्राकार, हरिप्रसाद चौलागाई र पूर्ण श्रेष्ठ ‘हृदयकृत’ले दश थान उत्कृष्ट कविताहरू वाचन गरेका थिए।
कविहरूका रचनाले उपस्थित साहित्यप्रेमीहरूलाई मन्त्रमुग्ध बनाएको थियो। यसैगरी, गत असोज ७ गते आयोजित पनौती नगरव्यापी आधारभूत तहको निबन्ध प्रतियोगितामा उत्कृष्ट स्थान हासिल गर्ने विद्यार्थीहरूलाई सोही समारोहमा पुरस्कार तथा प्रमाणपत्र वितरण गरिएको थियो। प्रतियोगितामा प्रथम, द्वितीय र तृतीय हुन सफल क्रमशः सरस्वती कुञ्ज बोर्डिङ स्कुलकी ग्रीष्मा बजगाई, सूर्योदय माध्यमिक बोर्डिङ स्कुलका विजय तामाङ र कुशादेवी माविकी अनिसा हुमागाईलाई पुरस्कार तथा प्रमाणपत्र प्रदान गरिएको हो।
कार्यक्रमका प्रमुख अतिथि वरिष्ठ साहित्यकार सूर्यप्रसाद लाकोजुले विजयी विद्यार्थीहरूलाई बधाई ज्ञापन गर्दै पुरस्कार वितरण गर्नुभएको हो । सो अवसरमा बोल्दै प्रमुख अतिथि लाकोजुले साहित्यले समाजलाई जोड्ने र बालबालिकामा लुकेको प्रतिभा उजागर गर्न यस्ता प्रतियोगिता तथा साहित्यिक गतिविधिहरूले महत्त्वपूर्ण भूमिका खेल्ने बताउनुभयो। कार्यक्रममा स्थानीय साहित्यकार, शिक्षक, विद्यार्थी तथा साहित्यप्रेमीहरूको उत्साहजनक उपस्थिति रहेको थियो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |