पनौती
पनौती नगरपालिका वडा नं ७ मा अवस्थित ‘वे टु विज्डम मण्टेश्वरी स्कुल’ले आठौँ अभिभावक दिवस तथा पाँचौँ दीक्षान्त समारोह भव्य रूपमा मनाएको छ ।
कार्यक्रमका अवसरमा विद्यालय परिसर साना नानीबाबुहरूले रोमाञ्चक तथा उत्साहपूर्ण प्रस्तुति गरेका थिए । कार्यक्रममा प्ले ग्रुपदेखि यूकेजीसम्म अध्ययनरत विद्यार्थीहरूले नृत्य, गीत, नाटक, राइम्स लगायत विविध प्रस्तुतीमार्फत आफ्नो प्रतिभा प्रस्तुत गरेका थिए। विशेषगरी साना विद्यार्थीहरूको मनमोहक नृत्यले कार्यक्रमलाई अत्यन्त मनोरञ्जनात्मक बनाएको थियो।
साथै, एलकेजी र यूकेजीका विद्यार्थीहरूले प्रस्तुत गरेको तेक्वान्दो प्रदर्शनले अनुशासन र आत्मरक्षाका लागि बालबालिकाहरुलाई कसरी तयार पार्न सकिन्छ भन्ने सन्देश दिएको थियो। कार्यक्रमकी प्रमुख अतिथि पनौती नगरपालिकाकी उपप्रमुख गीता बन्जाराले बालबालिकाको स्वास्थ्य, पोषण र व्यवहारिक शिक्षामा विशेष ध्यान दिनुपर्नेमा जोड दिइन्।
उनले पछिल्लो समय बढ्दो जङ्क फूडको प्रयोगले बालबालिकाको स्वास्थ्यमा नकारात्मक असर पारिरहेको उल्लेख गर्दै विद्यालय र अभिभावकले यस्ता अस्वस्थकर खाना तथा व्यवहार निरुत्साहित गर्नुपर्ने धारणा राखिन्। कार्यक्रममा कक्षा यूकेजीका १८ जना विद्यार्थीहरूलाई औपचारिक रूपमा दीक्षित गरिएको थियो।
विद्यालयकी प्रधानाध्यापक मेघा मल्लले विद्यालयले मंटेश्वरी पद्धतिमा आधारित बालकेन्द्रित शिक्षालाई प्राथमिकता दिँदै आएको जानकारी दिइन्। उनका अनुसार विद्यालयमा स्थानीय संस्कृतिसँग एकीकृत पाठ्यक्रम, सुरक्षित तथा बालमैत्री वातावरण, अनुभवी तथा प्रशिक्षित शिक्षक टोली, मिश्रित शिक्षण विधि तथा प्रयोगात्मक सिकाइमा विशेष जोड दिइन्छ।
बालबालिकामा आत्मनिर्भरता, आत्मविश्वास, सिर्जनशीलता र सामाजिक सीप विकास गर्ने उद्देश्यले विभिन्न क्रियाकलाप सञ्चालन गरिँदै आएको उनले बताइन्। २०७४ सालमा स्थापना भएको यस विद्यालयले छोटो समयमै गुणस्तरीय शिक्षा, अनुशासन र बालमैत्री वातावरणका कारण अभिभावकहरूको विश्वास जित्न सफल भएको छ।
अभिभावक दिवस कार्यक्रमले विद्यालय र अभिभावकबीचको सम्बन्ध अझ सुदृढ बनाएको कार्यक्रमा सहभागी अतिथिहरुको भनाई थियो ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |