माग पूरा भएपछि मात्र शिक्षकहरुले राजधानी छोड्ने

काठमाडौं । देशभरका शिक्षकहरु आन्दोलित बनेका छन् । पूर्व निर्धारित कार्यक्रम अन्तर्गत चैत्र २० गते देखि उनीहरु राजधानी उत्रिएर आन्दोलनम सहभागी बनेका हुन् ।

गत माघ २० गतेदेखि चरणबद्ध रुपमा आन्दोलनमा रहेको नेपाल शिक्षक महासंघको नेतृत्वमा अनिश्चितकालिन आन्दोलन शुरु गरिएको हो । यस अघि पनि शिक्षकहरुले पटक–पटक अन्दोलन गर्दै आएका थिए । सरकार पक्षबाट वार्ता पछिको सहमतिबाट ती आन्दोलन तत्कालका लागि टुङ्गिए पनि सहमति कार्यान्वयनमा धोका पाएको उनीहरुको गुनासो छ । उपलब्धि हासिल गर्नकै लागि अनिश्चितकालिन आन्दोलन गर्नुपरेको महासंघले जनाएको छ ।

गुणस्तरीय विद्यालय शिक्षा, विद्यार्थी र शिक्षक कर्मचारीमैत्री अग्रगामी विद्यालय शिक्षा ऐन जारी गराउन राज्य पक्षलाई दबाब दिन आन्दोलन गरेको महासंघले जनाएको छ ।

महासंघ नेतृत्वमा शिक्षकहरुले बुधबार दिउँसो १ बजे राजधानीका विभिन्न स्थानबाट ¥यालीसहित निस्केर माइतीघरबाट बिजुलीबजार परिक्रमा गरि पुनः माइतीघर क्षेत्रमा नै प्रदर्शन गरेको थियो ।

‘काठमाडौँ जाऔँ’ अभियान अन्तर्गत अनिश्चितकालीन सडक आन्दोलन निरन्तर चल्ने बताइएको छ । आजको कार्यक्रममा हजारौंको संख्यामा शिक्षकहरु सहभागी थिए । तत्काल शिक्षा ऐन जारी हुनुपर्ने र शिक्षा ऐन लिएर मात्र विद्यालयमा फर्कने आन्दोलनमा सहभागी शिक्षक नेताहरुले बताएका छन् ।

त्यसैगरी आयोजक संस्था नेपाल शिक्षक महासघंका अध्यक्ष लक्ष्मीकिशोर सुवेदीले गुणस्तरीय विद्यालय शिक्षा, विद्यार्थी र शिक्षक कर्मचारीमैत्री अग्रगामी विद्यालय शिक्षा ऐन जारी गराउन राज्यपक्षलाई बाध्य पार्न आन्दोलन गर्न लागिएको भन्दै राजधानी आएका शिक्षक माग पुरा नभए सम्म नफर्कने तथा यस अघि गरिएका सम्झौता पालना नभएको भन्दै सरकार पक्षसँग वार्ताको औचित्य नभएको बताए ।