सिद्धार्थ वनस्थली पनौतीमा विद्यार्थी दिक्षान्तसँगै अभिभावक भेला

पनौती
“ज्ञान नै शक्ति हो” भन्ने मूलमन्त्र बनाएको सिद्धार्थ बनस्थली इन्स्टिच्युट पनौती क्षेत्रक लागि उत्कृष्ट गन्तव्य हो । बालकालिकाहरुका लागि गुणस्तरीय शिक्षा प्रदान गर्न विभिन्न प्रयासरत उक्त विद्यालयले एक भव्य समारोहका बीच आफ्नो पूर्व प्राथमिक तहको दिक्षान्त समारोह तथा अभिभावक भेला सम्पन्न गरेको छ ।

विद्यालयले आयोजना गरेको उक्त कार्यक्रममा ३८ जना विद्यार्थी दीक्षित भए । विद्यालयको प्राङ्गणमा कार्यक्रम आयोजना गरिएको थियो ।
कार्यक्रमको सभापति तथा विद्यालय व्यवस्थापन समितिका अध्यक्ष केशव थापाले कार्यक्रमको उदघाटन गरेका थिए । थापाले कार्यक्रममा बोल्दै शिक्षाको महत्व र बालबालिकाको भविष्य निर्माणमा विद्यालयको भूमिकाबारे चर्चा गरे । उनले दीक्षित हुने विद्यार्थीहरूलाई बधाई ज्ञापन गर्दै आगामी शैक्षिक यात्राका लागि शुभकामना व्यक्त गरेका थिए

कार्यक्रममा बोल्दै बिद्यालय प्राचार्य रेश्मा थापाले यू के जिका विद्यार्थीलाई दिक्षित गर्नु भनेको उनीहरुको हौसल्ला अभिबृद्धि गर्नु भएको बताइन् । सानो भन्दा सानो खुसिमा रमाउन दिदा ती बालकालिकाहरुको सुन्दर भविष्य निर्माणमा सघाउ पुग्ने उनको तर्क थियो । साथै उनले अभिभावकहरुलाई आफ्ना बाबुनानीहरुको हरेक पलमा साथ दिन र ख्याल राख्न अनुरोध गरिन् ।

कार्यक्रममा नर्सरी र एलकेजीका साना विद्यार्थीहरूले प्रस्तुत गरेको आकर्षक नृत्यले सबैको मन जितेको थियो । नानीबाबुहरूको मनमोहक प्रस्तुतिले अभिभावकहरुलाई आकर्षित गरेको थियो । कार्यक्रमको अर्को आकर्षण यूकेजीका विद्यार्थीहरूले प्रस्तुत गरेको फेसन सो थियो, जसले उपस्थित सबैलाई मनोरञ्जन प्रदान गरेको थियो ।

कार्यक्रममा धितोपत्र बोर्डका कायममुकायम कार्यकारी निर्देशक रुपेश केसि, अन्नपूर्ण मिडिया प्रालिका जनरल मेनजर मनोज बस्नेत, शिक्षा क्षेत्रका प्रतिष्ठित व्यक्तित्व राम प्रसाद अधिकारी, विद्यार्थी, शिक्षकहरु र अभिभावकहरूको उल्लेखनीय उपस्थिति रहेको थियो।

हाल सिद्धार्थ बनस्थली इन्स्टिच्युटको पूर्व प्राथमिक तहमा २००, कक्षा १ देखि १० सम्म ३५० र कक्षा ११ र १२ मा ७५ जना विद्यार्थी अध्ययनरत रहेको विद्यालयका सुचना अधिकारी प्रविण दाहालले जानकारी दिए । विद्यालयले विद्यार्थीहरूको सर्वाङ्गीण विकासका लागि संस्कार सहितको गुणस्तरीय शिक्षा प्रदान गर्ने विषयमा विद्यालय सधै प्रतिबद्ध रहेको समेत उनको भनाई छ ।