नवदुर्गा सहकारीको २२ औँ वार्षिक साधारण सभा सम्पन्न

श्री नवदुर्गा बचत तथा ऋण सहकारी संस्था लिमिटेडले आफ्नो २२ औँ वार्षिक साधारण सभा भव्यताका साथ सम्पन्न गरेको छ।

दुई चरणमा सम्पन्न भएको सभाको पहिलो चरण २०८२ साल भाद्र १४ गते विभिन्न सेवा केन्द्रहरूमा क्षेत्रगत रूपमा गरिएको थियो भने दोस्रो चरण भाद्र २१ गते पनौतीस्थित ताम्राकार पार्टी भेन्यूमा केन्द्रीय सभा स्वरूप आयोजना गरिएको हो।

संस्थाका अध्यक्ष इन्द्र प्रसाद हुमागाईको सभापतित्वमा सम्पन्न कार्यक्रममा बागमती प्रदेश सहकारी संघ लिमिटेडका अध्यक्ष रामशरण शर्मा प्रमुख अतिथि रहनुभएको थियो। साथै नेपाल बार एसोसिएसन काभ्रे शाखाका पूर्व अध्यक्ष तथा कानुनी सल्लाहकार रमेश प्रसाद हुमागाई, नेफ्स्कूनका प्रमुख कार्यकारी अधिकृत डा. शिवजी सापकोटा, विभिन्न सहकारी संघसंस्थाका प्रतिनिधि, समाजसेवी, पत्रकार र शेयर सदस्यहरूको उल्लेखनीय उपस्थिति थियो।

कार्यक्रम सञ्चालन संस्थाका सचिव अकुर प्रसाद सापकोटाले गरेका थिए भने प्रमुख कार्यकारी अधिकृत दिपक तिमल्सिनाले संस्थाको वर्तमान अवस्था र प्रगति विवरण प्रस्तुत गरेका थिए। दुई दशकअगाडि २५ जना युवाको सामूहिक पहलबाट सुरु भई २०५९ सालमा विधिवत दर्ता भएको यो सहकारी हालसम्म १० वटा सहकारी संस्थासँग एकीकरण भई काभ्रेपलाञ्चोकका ६ नगरपालिका र २ गाउँपालिकामा आफ्नो कार्यक्षेत्र विस्तार गरिसकेको छ।

हाल संस्थाको कुल पुँजी रु. १ अर्ब १४ करोड ७३ लाखभन्दा बढी पुगेको छ। शेयर पुँजी रु. १० करोड ७१ लाख, बचत संकलन रु. ९० करोड ९९ लाख, ऋण लगानी रु. ९० करोड ९८ लाख रहेको छ भने कुल १०,१६८ जना शेयर सदस्यहरूमा ५७ प्रतिशत महिला सदस्य रहेका छन्। यस आर्थिक वर्षमा रु. ७७ लाख ९१ हजारभन्दा बढी राजस्व भुक्तानी भएको छ।

आफ्नै भवनबाट प्रविधिमैत्री सेवा उपलब्ध गराउँदै आएको संस्थाले सदस्यहरूलाई निःशुल्क एसएमएस र मोबाइल बैंकिङ सुविधा प्रदान गर्दै आएको छ। साथै, शिक्षा, स्वास्थ्य उपचार सहयोग, सुत्केरी एम्बुलेन्स खर्च, ज्येष्ठ नागरिक पोषण खर्च, रक्तदान, वृक्षारोपण र स्थानीय विकास कार्यमा समेत सक्रिय रहँदै आएको छ।

साधारण सभाको अवसरमा संस्थामा विशेष योगदान पुर्‍याउने दिर्घकालीन बचतकर्ता, पूर्व सञ्चालक, ज्येष्ठ सदस्य, उत्कृष्ट विद्यार्थी, असल ऋण कारोबारी, अधिक शेयर खरिदकर्ता, विभिन्न बचत योजनाका उत्कृष्ट बचतकर्ता तथा उत्कृष्ट कर्मचारी सरस्वती होमागाईलाई सम्मान गरिएको थियो।

समापन सत्रमा सल्लाहकार उपेन्द्र प्रसाद हुमागाईको संयोजनमा आ.व. २०८१/८२ का लागि सचिव, कोषाध्यक्ष र लेखा सुपरिवेक्षण समितिको प्रतिवेदन पारित गरिनुका साथै आगामी आ.व. २०८२/८३ का लागि वार्षिक कार्ययोजना तथा बजेट पारित, बाह्य लेखा परीक्षक नियुक्त, विनियम संशोधन, संस्था एकीकरण निरन्तरता र शेयर लाभांश वितरण गर्ने जस्ता निर्णयहरू सर्वसम्मतिले पारित गरियो।

सभाले संस्थाको हालसम्मको उपलब्धि सदस्यहरूको विश्वास र सहयोगकै परिणाम भएको उल्लेख गर्दै भविष्यमा अझ जिम्मेवार भई सदस्य हितमा काम गर्ने प्रतिबद्धता व्यक्त गरेको छ।