पनौती
नेपाली काँग्रेसका केन्द्रीय सदस्य तथा पूर्व सांसद शिव प्रसाद हुमागाईले भ्रष्टाचारविरुद्ध सडकमा उत्रिएका नयाँ पुस्ता (जेन्जी समूह) का आन्दोलनमा स्वार्थ समूहको घुसपैठले अप्रिय घटनाहरू घटेको दाबी गरेका छन् ।
बुधबार दिउँसो पनौतीस्थित आफ्नै निवासमा आयोजित पत्रकार भेटघाटमा बोल्दै उनले सिंहदरबार, सर्वोच्च अदालत, पालिका कार्यालय लगायत सरकारी भवनहरूमाथि एकैप्रकारको आक्रमण हुनु संयोग मात्र नभई योजनाबद्ध गतिविधि भएको बताए । उनका अनुसार सरकारी निकाय मात्र नभई ठूला व्यवसायिक केन्द्र, पसल र निजी घरहरूमासमेत आगजनी, लुटपाट र तोडफोड हुनु दुःखद भएको छ ।
“यी गतिविधिका कारण धेरै घरपरिवार विस्थापित भएका छन्, दशैंको मुखमा हजारौंको रोजगारी गुमेको छ,” हुमागाईले भने । उनले नेपाली काँग्रेसका सभापतिमाथि भएको आक्रमणप्रति खेद प्रकट गर्दै त्यसलाई ‘विधि र कानुनी शासन विपरीत’को कार्य भने ।
हुमागाईले प्रजातान्त्रिक विचारधारामा अडिग रहँदै करिब दुई दशकदेखि राजनीति गर्दै आएको स्मरण गरे । यस अवधिमा दुई वर्ष जेल जीवन बिताएको, पटक–पटक हिरासतको पीडा व्यहोरेको उनले बताए । पनौतीमै बसेर राजनीति गर्दा सडक, विद्युत, पुल, विद्यालय, महाविद्यालय र प्राविधिक संस्थान स्थापनामा महत्वपूर्ण योगदान दिएको दाबी गर्दै उनले भने, “म कुनै लाभको पदमा रहेन, सधैं नागरिककै पक्षमा उभिएँ ।”
फूलबारीको शोभा बढाउन थरी–थरी फूल चाहिने जस्तै विभिन्न विचारप्रति सधैं सम्मान गर्दै आएको उल्लेख गर्दै उनले कोही कसैलाई जानेर पीडा नदिएको स्पष्ट पारे । हालसम्म सात दर्जनभन्दा बढी बालबालिकालाई शिक्षा प्राप्त गर्न सहयोग गरेको उदाहरण प्रस्तुत गर्दै उनले आफ्नै पुख्र्यौली थलोमा परिवारसहित बस्दाबस्दै घरमाथि भएको आक्रमण ‘सधैं खोजीको विषय’ बन्ने बताए ।
आन्दोलनको पहिलो दिनको घटनामा मारिएकाहरूको श्रद्धाञ्जलीका नाममा विभिन्न दलहरूको संलग्नतामा भएको हिंसात्मक गतिविधि ‘रास्वपा लगायत सत्ता बाहिर रहेका दलहरूको नेतृत्वमा घटेको’ दाबी गर्दै उनले त्यसलाई सुनियोजित षड्यन्त्रको परिणाम भने ।
पनौती नगरपालिका भित्र नगर प्रमुख रामशरण भण्डारी, उपप्रमुख गीता बञ्जारा, समाजसेवी रामेश्वर थापा र पूर्व नगरप्रमुख भीम न्यौपानेको घरसमेत आन्दोलनको मर्म विपरीत आक्रमणमा परेको उनले बताए ।
हुमागाईले सार्वजनिक तथा निजी सम्पत्तिमाथि आक्रमण गर्ने आतातायी र लुटेराहरूमाथि कडा कानुनी कारबाही गर्न बलियो आयोग गठन गर्न सरकारसँग माग गरे । भ्रष्टाचार वा अन्य अपराधविरुद्ध कानुनको कठघरामा उभ्याइ कारबाही गर्नुपर्नेमा जोड दिँदै उनले भने, “व्यक्ति केन्द्रीत आन्दोलन कोही कसैको हितमा हुँदैन ।”
उनले दलहरूले नयाँ पुस्ताको भावना बुझेर आफ्ना कमजोरी सुधार्नुपर्ने, संस्थागत सुधारमार्फत जनताको अपेक्षा पूरा गर्नुपर्ने बताए । “जनतामा आएको निराशाले ठूलो सुधारको आवश्यकता पुष्टि गरिसकेको छ । तर निराशा अन्त्यको नाममा विद्यमान संविधान र व्यवस्था मास्ने कुरा स्वीकार्य हुँदैन,” उनले भने ।
घटनामा ज्यान गुमाएका र घाइतेहरूलाई न्याय दिलाउन तत्काल आयोग गठन गर्न सरकारलाई आग्रह गर्दै उनले तोकिएको समयमा निर्वाचन गर्नुपर्नेमा जोड दिए । “नयाँ पुस्ताको चाहना सम्बोधन गर्दै लोकतन्त्र रक्षाको जिम्मा काँग्रेसले लिनुपर्छ,” उनले भने ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |