काठमाडौं
राजधानी केन्द्रित आन्दोलन गरिरहेका शिक्षकहरुलाई शिक्षा मन्त्रालयले आन्दोलन स्थगित गरेर वार्तामा आउन आह्वान गरेको छ । सरकारको अवह्वान पछि आन्दोलनको नेतृत्व गरिरहेको नेपाल शिक्षक महासंघले वार्तामा सहभागी नबन्ने अडान पुनः दोहोर्याएको छ ।
विद्यार्थी र शिक्षकमैत्री ऐन लिएर मात्रै काममा फर्कने बताइरहेका आन्दोलनरत शिक्षकहरुले यस अघिको जस्तो उधारोमा सहमति हुने वार्तामा सहभागी नबन्न नेतृत्वलाई दवाव दिइरहेका छन् । शिक्षक माहसंघका अध्यक्ष लक्ष्मी किशोर सुवेदीले ‘कि जितिन्छ कि बितिन्छ’ भन्ने नारा सहित विद्यालय शिक्षा ऐनका विषयमा शिक्षकहरुको अन्तिम सडक आन्दोलन हुने र उपलब्धि हासिल पछि मात्र कार्यस्थल फर्किने बताएका छन् ।
शिक्षा विज्ञान तथा प्रविधि मन्त्रालयले आन्दोलनरत शिक्षकलाई वार्तामा डाकेको छ । मन्त्रालयका प्रवक्ता शिवकुमार सापकोटाद्वारा हस्ताक्षरित विज्ञप्तिमा शिक्षक समुदायसँग विगतमाझैँ फेरि पनि सान्दर्भिक छलफल गर्न र साझा धारणा निर्माण गर्न नेपाल सरकार हमेसा तयार रहेको उल्लेख छ । तर महासंघले विगतका शैलिमा वार्ता र सहमति नहुने स्पष्ट परिसकेको छ ।
शिक्षकहरु विद्यालय शिक्षा ऐन तत्काल पारित गर्नुपर्ने र विगतका सम्झौता पालना गर्नुपर्ने माग सहित सडकमा उत्रिएका हुन् । आन्दोलनको दोस्रो दिन (विहिवार) पनि एक लाख भन्दा बढि संख्यामा रहेका शिक्षकहरु प्रदर्शनमा सहभागी बनेका थिए ।
प्रस्तावित विद्यालय शिक्षा विधेयक संसद्को शिक्षा स्वास्थ्य तथा सूचना प्रविधि समितिमा विचाराधीन छ । तर शिक्षक आन्दोलन चलिनै रहँदा हिउँदे अधिवेशन अन्त्य भइसकेको छ । संसद बन्द भए पनि आन्दोलनरत शिक्षक नेताहरूले अध्यादेशबाट भए पनि विधेयक ल्याउनुपर्ने माग गरेका छन् ।
मन्त्रालयद्वारा जारी विज्ञप्तिमा शिक्षा ऐन जारी गर्न सरकार लागि परेको र शिक्षकहरुले आन्दोलन छोड्नु पर्ने उल्लेख छ । शिक्षकहरुलाई पुरानै शैलिमा यसैगरी विद्यालय शिक्षा विधेयक समयमै पारित गर्ने वातावरण सिर्जना गर्नका निमित्त सिंगो शिक्षक समुदायको पैरवी, सरोकार र ऐक्यबद्धताका बारेमा मन्त्रालय सदैव सकारात्मक रहेको विज्ञप्तिमा भनिएको छ । यस अघिनै भएको सम्झौता कार्यान्वयनमा आलटाल भए सँगै शिक्षकहरुले भने आन्दोलन रोक्न नहुने तर्क गरेका छन् ।
शिक्षक महासंघका अध्यक्ष सुवेदीका अनुसार डेढलाख बढि शिक्षक सडकमा उत्रिएका छन् । यो संख्या अझै बढ्ने उनले बताए । जति धेरै शिक्षक सहभागी हुन्छन्, त्यति चाँडै सफलता प्राप्त हुने सुवेदीको भनाई छ । उनले सबै शिक्षक–कर्मचारीलाई आन्दोलनको मोर्चामा आउन समेत अपिल गरेका छन् ।
