भकुण्डेबेशीमा कार दुर्घटना, चार जना भारतीय नागरिक घाइते

काभ्रे,
काभ्रेपलाञ्चोक जिल्लाको नमोबुद्ध नगरपालिका–६ चौकिडाँडा स्थित बी.पी. राजमार्गमा एक कार अनियन्त्रित भई सडकबाट तल खस्दा चार जना भारतीय नागरिक घाइते भएका छन्।
काठमाण्डौबाट वीरगञ्जतर्फ गइरहेको भारतको बी.आर. ०१–डी.पी. १००० नम्बरको कार ब्रेक फेल भएर अन्दाजी ७ मिटर तल खसेको थियो। घटनामा कारमा सवार भारत, पटना बिहार निवासी ४६ वर्षीय चालक अजय कुमार, ४८ वर्षीया सुनिता देवी, २० वर्षीया अञ्जली सिंह र ३० वर्षीय धिरज कुमार थिए।
घटनापछि घाइतेहरुलाई उपचारका लागि तत्कालै भकुण्डे स्थित मेथिनकोट अस्पतालमा पठाइएको थियो। अस्पताल स्रोतका अनुसार सामान्य चोट लागेका अजय कुमार र सुनिता देवीको अवस्था मध्यम रहेको जनाइएको छ भने अन्य दुई यात्रुहरूलाई कुनै चोट नलागेको पुष्टि भएको छ । डाक्टरको सल्लाहमा घाइतेहरूलाई साँझ ६ः४५ बजे डिस्चार्ज गरिएको थियो।
ब्रेक फेल भई अनियन्त्रित भएको कारले काठमाण्डौबाट पूर्वतर्फ जाँदै गरेको बा ३ ख ७३२५ नम्बरको हायस भ्यानलाई पछाडिबाट ठक्कर दिँदा हायसमा पनि क्षति पुगेको छ । हायस चालक जिल्ला सुनसरी, रामधुली नपा–८ निवासी ४६ वर्षीय डिल्लीराम चौधरी रहेका छन्। दुर्घटना स्थल प्रहरी चौकी भकुण्डेबेशीबाट झण्डै ६ किलोमिटर पूर्व पर्छ।