धुलिखेल/ धुलिखेल नगरपालिकाको सत्रौं नगर सभाबाट प्रदेश सरकार खारेजीको प्रस्ताव पेश भएको छ । नगरपालिकाको जारी नगरसभाको शून्य समसयमा वडा नं. २ का अध्यक्ष अर्जुन न्यौपानेले राखेको सो प्रस्ताव राखेका हुन् ।
वडा अध्यक्ष न्यौपानेले भनेका छन् – “नेपालको संविधानबमोजिम बनेको प्रदेश सरकारले प्रदेश सभामा आगामि आर्थिक वर्षका लागि पेश गरेको नीति तथा कार्यक्रम र विनियोजन विधयेकमा गम्भिर प्रश्न खडा भएकाले प्रदेश सरकार खारेज गरी प्रदेश सरकारलाई विनियोजित बजेट सिधा स्थानीय तहमा विनियोजन गर्नका लागि यस सभा मार्फत संघिय सभामा प्रस्ताव पेश गर्न यस सम्मानित सभामा प्रस्ताव पेश गर्दछु ।”
न्यौपानेले उक्त प्रस्ताव पेश गर्दा सभामा सहभागिहरुले उत्साहका साथ तालि बजाएका थिए । प्रदेश सरकार खारेज गर्ने वडा अध्यक्ष न्यौपानेको प्रस्तावमा वडा नम्बर ३ का वडा अध्यक्ष गणेश आचार्यले समर्थन गरेका छन् । उनले प्रदेश सरकारले अपेक्षित काम गर्न नसकेको, बजेट माग गर्न जाँदा कार्यालय बन्द हुने गरेको भन्दै उनले आक्रोश पोखेका छन् । जनताको पक्षमा प्रदेश सरकारले काम गर्न नसकेको उनले बताए । प्रदेश सरकार खारेजको प्रस्ताव पेश गर्दा नगर सभा सदस्यहरुले समर्थन जनाउँदै तालि बजाएका थिए
उक्त प्रस्ताव नगरसभाबाट पारित भएको छ । नगर प्रमुख एवं सभाध्यक्ष अशोक व्याञ्जुले न्यौपानेको सो प्रस्ताव सर्वसम्मत पारित भएको घोषणा गरेका छन् ।
