काभ्रे
अब बनेपाबाट बेथानचोक ललितपुर हुँदै प्रदेश राजधानी हेटौंडासम्म यात्रुवाहक बसमार्फत सहज रूपमा यात्रा गर्न सकिने भएको छ।
मंसिर १ गतेदेखि बनेपा–च्याम्राङ्गबेशी हुँदै बागमती प्रदेशको राजधानी हेटौंडातर्फ ‘क्यू बस’ औपचारिक रूपमा सञ्चालनमा आएपछि स्थानीयवासी र यात्रुहरू उत्साहित बनेका छन्। बनेपाबाट चल्ने यस बस सेवा पनौती, ढुड्खर्क, च्याम्राङ्गबेशी, सुकमफेदी, ठूला दुर्लुङ, हुचिटार, बेतीनी हुँदै फापरबारीबाट हेटौंडा पुग्ने छ ।
पनौतीदेखि करिब १०६ किलोमिटर लामो यो मार्गमध्ये फापरबारी–हेटौंडा खण्ड ४३ किलोमिटर पक्की धारान–चतरा सडकअन्तर्गत पर्ने भए पनि बाँकी करिब ६३ किलोमिटर कच्ची सडकमै यात्रा गर्नुपर्ने हुन्छ। बागमती नदीमा पुल नहुँदा वर्षायाममा यो सडकखण्ड प्रायः अवरुद्ध हुने गरेको छ। निर्माणाधीन जलविद्युत् आयोजनाले हिउँदमा हुचिटार क्षेत्रमा कल्भर्ट निर्माण गरेपछि केही सहजता आए पनि दिगो समाधान भने छैन ।
बनेपाबाट हेटौंडा पुग्ने यो मार्ग भौगोलिक रूपमा सबैभन्दा छोटो भएकाले वैकल्पिक राजमार्गका रूपमा प्रस्तावित त छ तर निर्माण कार्यले आवश्यक गति लिन सकेको छैन । सडकको केही खण्डमा सुधार भए पनि प्याकेजमै बजेट विनियोजन नहुँदा कामले निरन्तरता पाउन सकेको छैन। सडकले छोएका तीन जिल्ला–काभ्रे, ललितपुर र मकवानपुरका सबै दलका नेताहरूले एउटै मञ्चबाट वैकल्पिक राजमार्ग निर्माणका आवश्यकता व्यक्त गरे पनि बजेट अभावले सडकले कदिगोपन प्राप्त गर्न नसकेको हो । फापरबारीका दुई खोलामा सुरु गरिएको छ । जसमध्येको एक पुलको निर्माण वर्षौँदेखि अधुरै छ भने मुख्य आवश्यकता मानिएको बागमती नदीको पुल निर्माण प्रक्रिया अझै थालिएको छैन।
काभ्रे र ललितपुरका पहाडी बस्तीका कृषकहरूले गाइवस्तुको दाना, भुसा, कृषि सामग्री तथा घरखर्चीका सामन ल्याउन यो मार्गको नियमित प्रयोग गर्दै आएका छन्। तर पुल अभाव र कच्ची सडकका कारण यो मार्ग आज पनि मौसमी बाटोको रूपमा सीमित छ। करिब ६० किलोमिटर सडक स्तरोन्नति भई पक्की निर्माण पूरा गर्न सके यो मार्गले प्रदेश राजधानीसम्मको सबैभन्दा छोटो पहुँच सुनिश्चित गर्नेछ, स्थानीयवासीको आर्थिक–सामाजिक जीवनस्तरमा समेत ठुलो परिवर्तन ल्याउने जानकारहरू बताउँछन्।
हाल सञ्चालनमा आएको क्यू बस सेवाले यात्रुलाई सुविधा मात्र प्रदान गरेको छैन, यसले मार्ग सुधार र दिगोपनका लागि राजनीतिक नेतृत्व र सम्बन्धित निकायलाई आवश्यक दबाब समेत सिर्जना गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |