पनौती । भोटेकोशी नदीमा आएको विनाशकारी बाढीबाट प्रभावित रसुवा, नुवाकोट र धादिङका बाढीपीडितका लागि प्याब्सन पनौतीले ११ लाख २४ हजार ३३ रुपैयाँ सहयोग गरेको छ ।
प्याब्सन काभ्रेमार्फत संकलित उक्त रकम प्रधानमन्त्री दैवी प्रकोप उद्धार कोषमा जम्मा गरिएको हो । विपद्का कारण ठूलो जनधनको क्षति बेहोरेका परिवारलाई राहत तथा पुनःस्थापनामा सहयोग पु¥याउने उद्देश्यले प्याब्सन पनौतीमा आबद्ध सदस्य विद्यालयहरूबाट रकम संकलन गरिएको जनाइएको छ ।
प्याब्सन काभ्रे जिल्ला बैठकका अवसरमा आयोजित कार्यक्रममा उक्त सहयोग रकम हस्तान्तरण गरिएको हो । कार्यक्रममा प्याब्सन केन्द्रीय उपमहासचिव भीमसेन केसीको प्रमुख आतिथ्यता रहेको थियो । कार्यक्रममा केन्द्रीय सचिवालय सदस्य हिरा शर्मा नेपाल, केन्द्रीय प्राज्ञिक सदस्य रवि वैद्य, प्याब्सन बागमती प्रदेश उपाध्यक्ष श्रीकृष्ण श्रेष्ठलगायत पदाधिकारी तथा प्रतिनिधिहरूको उपस्थिति थियो ।
प्याब्सन पनौतीका अनुसार सहयोग रकम विभिन्न १४ वटा सदस्य विद्यालयबाट संकलन गरिएको हो । सहयोग गर्ने विद्यालयहरूमध्ये काभ्रे इङ्लिश मा.वि.ले २ लाख ६७ हजार २५५ रुपैयाँ, न्यु राइजिङ मा.वि.ले १ लाख ४१ हजार १११ रुपैयाँ, सरस्वती कुञ्ज बोर्डिङ स्कुलले १ लाख ३५ हजार १०५ रुपैयाँ तथा नवरत्न अङ्ग्रेजी मा.वि.ले १ लाख ११ हजार १११ रुपैयाँ सहयोग गरेका छन् ।
त्यस्तै अरुणोदय अङ्ग्रेजी मा.वि. र सामुदायिक बोर्डिङ स्कुलले समान १ लाख १ हजार १११ रुपैयाँ, सिद्धार्थ बनस्थली इन्स्टिच्युटले ८५ हजार ५५५ रुपैयाँ, हाइल्याण्ड अङ्ग्रेजी बोर्डिङ स्कुलले ५० हजार ५५५ रुपैयाँ तथा लिलावती नेसनल एकेडेमीले ५० हजार ५ रुपैयाँ सहयोग गरेका छन् ।
ज्ञानज्योति एजुकेसनल एकेडेमीले ४० हजार रुपैयाँ, सूर्योदय अङ्ग्रेजी मा.वि.ले ११ हजार १११ रुपैयाँ, मानेदोभान इङ्लिश स्कुलले १० हजार ३ रुपैयाँ तथा बाटिका दि गार्डेन र पुष्पाञ्जली किन्डरगार्डेनले समान १० हजार रुपैयाँ सहयोग गरेका छन् ।
प्याब्सन पनौतीले विपद्को समयमा पीडितको साथमा उभिनु मानवताको महत्वपूर्ण परिचय भएको उल्लेख गर्दै सहयोग गर्ने सम्पूर्ण सदस्य विद्यालय, विद्यालय परिवार तथा सहयोगीप्रति आभार व्यक्त गरेको छ । विपद्का बेला गरिएको यस प्रकारको सामूहिक सहयोगले राहत तथा पुनःस्थापनाका प्रयासमा योगदान पु¥याउनुका साथै शैक्षिक संस्थाहरूको सामाजिक उत्तरदायित्वलाई समेत थप बलियो बनाउने अपेक्षा गरिएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |