धुलिखेल
प्रथम काभ्रे ह्वीलचेयर बास्केटबल प्रतियोगिताको प्रथम उपाधी जावलाखेल ह्वीलचियर स्पोर्ट समूहले हात परेको छ ।
पनौती–५ स्थित काठमाडौं युनिभर्सिटी हाइस्कुल चौकोटको खेलमैदानमा बास्केटबल प्रतियोगिता आयोजना गरिएको थियो । मेरुदण्ड पक्षघात संघले प्रतियोगिता आयोजना गरेको थियो । प्रतियोगितामा काभ्रे, काडमाडौं ललितपुरका ६ टिम सहभागी थिए ।
प्रतियोगितामा नेपाल आर्मी क्लब दोस्रो र स्पाइनल कर्ड इन्जुरी राष्ट्रिय संजाल तृतीय भयो । उत्कृष्ट खेलाडी जावलाखेल ह्वीलचिेयर स्पोर्ट समूहका डम्बर बहादुर मगर र उत्कृष्ट स्कोरतर्फ नेपाल आर्मीका दान बहादुर थिङ घोषणा भए ।
प्रतियोगिहरुलाई कार्यक्रमका अतिथि जिल्ला समन्वय समितिका प्रमुख दीपक गौतम तथा पनौती नगरप्रमुख रामशरण भण्डारी लगायतले नगद शिल्ड प्रमाण पत्र प्रदान गरेका थिए ।
प्रतियोगिता उदघाटन बागमती प्रदेशका खानेपानी, उर्जा तथा सिंचाइमन्त्री तीर्थ लामाले गरेका थिए । उनले मानवअधिकार संरक्षण सबैको दायित्व भएको उल्लेख गर्दै फरक क्षमता भएका व्यक्तिहरुले आयोजना गरेको कार्यक्रमले आफूलाई हौसला मिलेको बताए ।
जिल्ला समन्वय समिति काभ्रेका प्रमुख दीपक गौतमले खेलाडी राष्ट्रका गहना भएपनि खेलकुद क्षेत्र पिछडिको विचार व्यक्त गर्दै प्रतियोगिताले सबैको लागि प्रेरणा दिएको बताए ।
कार्यक्रममा उपस्थितलाई स्वागत व्यक्त गर्दै काभ्रे बहिरा विद्यालयका प्रधानाध्यापक कृष्णप्यारी नकर्मिले तीनै तहका सरकारलाई फरक क्षमता भएकाहरुको लागि काम गर्न अनुरोध गरिन । मेरुदण्ड पक्षघात संघ काभ्रेका अध्यक्ष महेश्वर थापाले संघको तर्फबाट यस प्रकारका कार्यक्रम पहिलो भएको र यसले निरन्तरता पाउने बताए ।
मेरुदण्ड पक्षघात संघ बनेपा काभ्रे मुख्य आयोजक रहेको कार्यक्रमको मुख्य प्रयोजक जिल्ला समन्वय समिति काभ्रेपलाञ्चोक, पनौती नगरपालिका,बनेपा नगरपालिका र रोशी गाउँपालिका तथा सहप्रायोजकको रुपमा काठमाण्डौं विश्वविद्यालय रहेको काठमाडौं युनिभर्सिटी हाइस्कुल चौकोटका विवेक भट्टराईले जानकारी दिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |