बेथानचोक वडा नं १ च्याम्राङ्गबेसी स्थित तीन तले झरनामा यतिखेर आन्तरिक पर्यटकहरु बढेका छन् ।
विशेषगरी विदाको दिनमा झरना सम्म पुग्नेहरुको भिड नै हुने गरेको छ । वडा नं १ को च्यालम तथा फाइमराङको बिचमा रहेको झरनामा गतवर्षहरुमा पनि पर्यटकहरु आउने गरेका थिए ।
तीनतले झरनासँगै रहेको पोखरीमा पौडीको मज्जा लिँदै
झरना स्थलमा उपयुक्त पुर्वाधारको अभावमा सिमित पर्यटकहरु आउने गरेको भए पनि गत आर्थिक वर्षमा बेथानचोक गाउँपालिका द्वारा बिनियोजित कुल २० लाखको लागतमा आवश्यक भौतिक संरचना निर्माण पश्चात झरना अवलोकन तथा झरना सँगैरहेको पानीमा पौडी खेली मनोरञ्जन गर्नेहरु बढेका हुन् ।
पालिका अध्यक्ष भगवान अधिकारी सहित
झरनाबाट झरेको पानीमा पौडी पोखरी, पोखरी वरपर घेराबार तीन तला मध्येको झरनाको दोस्रो तल्ला सम्म अवलोकनका लागि सिँढी तथा घेराबार निर्माण गरिएको वडा नं १का वडा अध्यक्ष मधुसुधन तिमल्सिनाले बताए ।
महाभारत पर्वतको जंगलमुहान रहेको चिसो पानी बग्ने झरना ३ तला भइ बगेको कारण नै तीनतले झरना नामाकरण गरिएको हो । झरनाको दोस्रो तला सम्म पुगी दोस्रो तला तथा सबैभन्दा तलकोे तलाको झरनासँगै निर्माण गरिएको पोखरी अवलोकन गर्न सकिन्छ ।
चिसो,सङ्गलो र शुद्ध पोखरीमा डुुबुल्की मार्दै स्नान गर्नु यहाँको अर्को आर्कषण हो । प्राकृतिक झरनाको अवलोकन तथा सँगैको पोखरीमा डबुुल्कीको अनुभव लिनेहरु जो कोही दोहर्याएर आउने गरेका स्थानीय राजकुमार घिमिरेले बताए ।
अहिले झरना अवलोकनका लागि उपत्यकाबाट ट्राभल प्याकेज नै बनाएर आन्तरिक पर्यटकहरु आउने गरेका वडा अध्यक्ष तिमल्सिना बताउँछन् ।
झरनामा जिल्लाका विभिन्न क्षेत्रका अलावा काठमाडौं, भक्तपुर, ललितपुर, मकवानपुरसँगै अन्य जिल्लाबाट समेत पर्यटकहरु आउन थालेका छन् । झरना बालबालिका देखि वयस्क सम्मको आकर्षणकाे केन्द्र बनेको छ । झरनासम्म पुगेर खिचिएका तस्विर भिडियो सामाजिक सञ्जाल फेसबुक तथा टिकटकमा पोष्ट गर्न स्थानीय समेत लालायीत हुने गरेका छन् ।
बाहिरी जिल्लाबाट आउनेहरुले स्थानीय मौलिक खानाको चासो राख्ने गरेका स्थानीयको भनाई छ । स्थानीय गाउँमा उत्पादित खुवा, मह, तरकारी तथा लोकल मकैंको ढिँडो, गुन्द्रुक जस्ता खानाको व्यपार बढेको उनीहरु बताउँछन् ।
झरना अवलोकनमा जानेहरुका लागि झरना स्थलबाट केही तल होटल लजको समेत व्यवस्था छ । झरनाको अवलोकन, पौडीको मज्जासँगै स्थानीय मौलिक खानाले झरनासम्म पुग्नेको यात्रा अविस्मरणीय बन्ने स्थानीय व्यवसायी सुमन दाहाल बताउँछन् ।
कसरी पुग्न सकिन्छ तीनतले झरना ?
झरना सम्म पुग्नका लागि क्षेत्रअनुसार फरक–फरक मार्गको उपयोग गर्न सकिन्छ । विशेष जिल्लाका शहरी क्षेत्रबाट झरना सम्म पुुग्न पनौती बसपार्कबाट करिब २५ किलोमिटर सडकयात्रा गर्नुपर्ने हुन्छ । जुन सडकको पनौती ढुर्खक करिब १३ किलोमिटर सडक ग्राभेल तथा पक्की छ । त्यस पछिको अर्को १२ किलोमिटर सडक उकालो ओरालो भए पनि गाडी तथा मोटरसाइकलमा यात्रा गर्न खासै कठिनाई छैन ।
तर उक्त खण्डको लागि सानाटायर भएका होचा गाडी भने उपयुक्त नहुन सक्छ । मोटरसाइकलको हकमा जुनसुकै प्रयोग गर्न सकिन्छ ।
ढुुर्खक देखि तीनतले झरना सम्मको यात्रा थप रोचक बन्न सक्छ । हिमाली हावासँगै उत्तरतर्फ लहरमा मिलेर बसेका सेताम्मे हिमाल निकटबाट झै नियाल्दै गुवा भञ्ज्याङ सम्मको यात्रा पछि शुरु हुन्छ गुवा भञ्ज्याङ देखि झरना सम्मको यात्रा । विशेषगरी लालीगुराँस फूल्ने मौसममा उक्त क्षेत्रले नयाँ यात्रुहरुलाई मोहनी नै लगाउने गर्छ । र्ढुखर्कदेखि झरना सम्मको क्षेत्रमा अहिलेको समय पहेँलाम्मे तोरीको फूलले भरिएका लहरमा मिलेका पाटा अनि सुर्काहरु मनमोहक देखिन्छन् । जहाँबाट नागबेली कच्चीबाटोको यात्रासँगै झरना सम्मको यात्रा तयहुन्छ ।
गोवाभञ्ज्याङबाट देखिने हिमाली दृष्य
त्यसैगरी अर्कोबाटो ललितपुरबाट छ । ललितपुरको दक्षिणी केन्द्र गोटिखेलबाट चन्दनपुर कालेश्वर हुँदै करिब १० किलोमिटिर ओरालो यात्रापछि च्याम्राङ्गबेसी सम्म पुगिन्छ । यो मार्गपनि चन्दनपुर सम्मको पक्की सडक तथा त्यसपछिको कच्ची भएपछि बाटो खासै कठिन छैन ।
त्यसैगरी हिउँदको समयमा प्रदेशराजधानी सम्म पुग्ने बेथानचोक फापरबारी सडक पनि यहीँ झरना नजिकबाट पर्छ । मकवानपुर लगायतका मानिसहरुका लागि उक्त मार्ग प्रयोग गरेर पनि सहज यात्रा गर्न सकिन्छ ।
पहाडी जंगल मुहान रहेको यस झरनामा हिउँदको समयमा पानीको मात्रा केही घटेपनि झरना सुुक्दैन । जसका कारण हिउँदको समयमा पनि झरनाको अवलोकन गर्न र पोखरीमा नुहाउँदै मनोरञ्जन गर्नेहरुका लागि यो स्थल अन्त्यन्तै उपयोगी हुन सक्छ ।
पहाडी मनोरम दृष्यको साथमा झरनाको अवलोकन गर्दै स्वच्छ, सफा र सङ्लो पानीले भरिएको पोखरीमा पौडीको मज्जा लिने उद्देश्य सहित हामी पनि जाने होइन त तीन तले झरना ?
(तस्विर स्रोतः मधुसुदन तमल्सिना, खेमराज दाहाल लगायत)
