अरनिको राजमार्ग सूर्यविनायक–धुलिखेल सडकको काम धमाधम

अरनिको राजमार्ग अन्तर्रगत कोटेश्वर सूर्यविनायक सडक
फोटो : गुगल

पुर्वी नाकाको निकास सँगै धुलिखेलको पर्यटन प्रवद्र्धनमा कोशेढुंगा सावित हुने

काभ्रेपलाञ्चोक-अरनिको राजमार्ग विस्तार कार्यक्रम अन्तर्गत काभ्रेपलाञ्चोक र भक्तपुरको सिमाना साँगादेखि धुलिखेल सडकखण्ड विस्तारको काम धमाधम भई रहेको छ ।
पटक पटक सडक स्तरउन्नतीको काम अगाडी बढाउन ताकेता भए पनि बल्ल कामले प्राथमिकता पाएको छ । करिब एक दशकदेखि नेपाल सरकारको प्राथमिकतामा परेर पनि विस्तार हुन नसकेको सूर्यविनायक–धुलिखेल सडक खण्ड अन्तर्गतको १६ किलोमिटर सडक खण्ड चालु आर्थिक वर्षबाट विस्तारको काम खण्ड खण्डमा गरी धमाधम भई रहेको छ ।

धमाधम विस्तार सुरु गरिएको सूर्यविनायकदेखि धुलिखेलसम्मको सडक ७५ फिट अर्थात् २५ गत (२२.६८ मिटर) को निर्माण हुने सडक विभागले जनाएको छ । भौगोलिक बनावट अनुसार सडकका संरचना निर्माण हुने बताइएको छ ।

साँगादेखि धुलिखेलसम्म २३ स्थानमा नालीको पानी निकास गरिने, पाँच स्थानमा बस स्टप बनाइने बताउँदै साँगादेखि धुलिखेलसम्म ७५ फिटभित्र छ वटा घर, ४२ कुवा, नौ वटा धारा, एउटा ढुङ्गे धारा, दुई वटा पानी ट्याङ्की, पाँच वटा मन्दिर र धुलिखेलमा एउटा पेट्रोल पम्प, हाइटेन्सन पोल सानुपर्ने आयोजनाले जनाएको छ ।

साँगादेखि धु्लिखेलसम्मको ८ दशमवल ५ किलोमिटर सडक निर्माणको लागि लामा कन्ट्रक्सनसँग भ्याटसहित चार अर्ब पाँच करोड ६४ लाख रुपियाँमा ठेक्का सम्झौता भएर काम सुरु गरेको हो ।

यसैबीच अरनिको राजमार्ग अन्र्तगत सूर्यविनायकदेखि साँगासम्मको ७ दशमलव ५ किलोमिटर सडक सडक विस्तारको लागि आशिष कुमार श्रेष्ठ,बन्धन,भगवती जेभीसँग भ्याटसहित तीन अर्ब ८८ करोड ९३ लाख रुपियाँमा ठेक्का सम्झौता भइ काम धमाधम भएको हो ।

भौगोलिक कारणले गर्दा सर्भिस लेन नबन्ने करिब डेढ किलोमिटर सडकलाई ग्रेड सेप्रेशन गरेर साँगाबाट सूर्यविनायक जाने सडक करिब तीन मिटर अग्लो र सूर्यविनायकबाट साँगातर्फ आउने सडक तीन मिटर होचो बनाइने बताइएको छ । सडक ब्यबस्थित भए सँगै सूर्यविनायकदेखि धुलिखेलसम्मको ट्राफिक व्यवस्थापन सहज हुने जिल्ला ट्राफिक प्रहरी कार्यालय काभ्र्रेपलाञ्चोकले बताएको छ । भक्तपुर पछाडी काभ्रेपलाञ्चोक जिल्लाको बनेपा, धुलिखेल, पनौती लगायत बिभिन्न नगरपालिका गाउँपालिकाहरु रहेका छन् । सडक स्तर उन्नती भए सँगै बनेपामा ब्यापारिक हब साथै धुलिखेल र पनौती पर्यटकिय नगरीको रुपमा अगाडी आउने बिश्वास लिइएको छ । सूर्यविनायक–धुलिखेल सडक अरनिको राजमार्गको एक खण्ड हो । उक्त राजमार्गबाट चीनसँगको तातोपानी नाका र वीपी राजमार्ग जोडिन्छ ।

यो खण्ड विस्तार भयो भने काठमाडौं भित्रिने र बाहिरिने सवारीको आवागमन सजिलो हुनेछ । यो सडक स्तरोन्नतिपछि अरनिको र बीपी राजमार्गसहित दोलखा, खोटाङ, रामेछाप, सिन्धुलीलगायत लामो दुरीका गन्तव्यमा चल्ने सार्वजनिक यातायातका लागि सहज हुनेछ । सडक विस्तार भएपछि धुलिखेलको पर्यटन प्रवद्र्धनमा पनि कोशेढुंगा सावित हुने धलिखेल नगरपालिकाले जानकारी दिएको छ । धुलिखेलमा ४९ वटा होटल निर्माण भएका छन् । होटलमा ९ सय ७२ वटा कोठामा १ हजार ७ सय ४५ वटा वेड रहेका छन् । जसमा ८ अर्ब २२ करोड ५३ लाख लगानी भएको छ भने २ अर्ब ४८ करोड ९० लाख ७२ हजार बैकले लगानी गरेको छ । धुलिखेलमा होटलहरुमा ९ सय ९२ जनाले प्रत्यक्ष रोजगार प्राप्त गरेका छन् ।

अत्याधुनिक उपकरणको प्रयोग गर्दै सडकको वाल निर्माण गरिँदै