बिपीकाे सालिक अनावरण गर्दै देउवाले भने बर्तमान सत्ता समिकरणले जनता खुशी छन्

धुलिखेल

पूर्वी नेपाल प्रवेश गर्ने सबै भन्दा छोटो राजमार्ग विपी राजमार्गको शुरुवाती विन्दु धुलिखेलमा नेपालका पहिलो जननिर्वाचित प्रधानमन्त्री विश्वेश्वर प्रसाद कोइराला (विपी) को पुर्ण कदको सालिक अनावरण गरिएको छ ।

काभ्रेपलाञ्चोक जिल्लाको धुलिखेल स्थित जरनडाँडामा निर्माण भएको पूर्णकदको सालिकको पूर्व प्रधानमन्त्री तथा नेपाली काग्रेसका केन्द्रीय सभापति शेरबहादुर देउवाले शनिवार अनावरण गरेका हुन् ।

सालिक अनावरण गर्दै सभापति देउवाले विपी राजमार्ग सडक निर्माणको ऐतिहासिक पृष्ठभूमिको चर्चा गरेका थिए । सडक निर्माणको क्रम शुरु भएपछि विपीकोइराला आफ्नो घरभएको क्षेत्रबाट बाटो निर्माण भएको आरोप लागेको प्रसंग उल्लेख गर्दै सिन्धुुलीको दुम्जा छाडेर बसाई सराई गरी सक्दा पनि उनलाई त्यसकिसिमको आरोप लागेको तर सडक निर्माण सम्पन्न भएपछि सडक पूर्वी क्षेत्रको तराई पहाड र हिमाल तीननै क्षेत्रलई जोडने महत्वपूर्ण सडकको रुपमा निर्माण भएको उल्लेख गरे । बर्तमान राजनीतिक समिकरणका विषयमा देउवाले कांग्रेस र एमाले मिलेर सरकार बनाउँदा जनमानसमा सकारात्मक सन्देश गएको बताएका छन् । यिनै दुई पार्टीको कचकच अन्त्य भएको भन्दै जनमानसबाट प्रतिक्रिया सुनिन थालिएको उनको भनाई थियो । उनले धेरै साना दलहरु मिल्नुभन्दा ठूला दलहरु मिलेर सरकार बनाउनुलाई नागरिकले दिगो हुने विश्वास लिएका बताएका हुन् ।

महामानव बिपी कोइरालाले देखाएको बाटो कांग्रेसका लागि सधैं प्रेरणादायी रहने भन्दै आम कांग्रेसजनले उनका सिद्धान्तलाई कहिल्यै भुल्न नहुने उनको भनाई थियो । हामी अहिले काम भएन भएन मात्र भन्छौं तर किन भएन भनेर खोजी गर्दैनौं भन्दै देउवाले नेताहरुलाई गाली मात्र गरेर भन्दा आफ्नो तहबाट काम गरेर मात्र देशको विकास सम्भव हुने बताए ।

अग्रज नेताहरुले छोडेर गएका अधुरा कामहरु पूरा गर्ने जिम्मेवारी अब पछिल्लो पुस्ताको काँधमा आएको बताउँदै देउवाले अप्ठ्याराहरुलाई पन्छाउँदै अघि बढ्नुपर्नेमा जोड दिए । उनले जनताका कामहरुमा सबैले जिम्मेवारीपूर्णरुपमा कर्तव्य पूरा गरेर जानुपर्ने आवश्यकता औंल्याए । आगामी दिनमा पार्टीलाई कसरी राम्रो गरेर अगाडी लैजान सकिन्छ भन्नेमा सबैले सोच्नु पर्ने र पार्टीलाई पहिलो पार्टी बनाउन लाग्नुपर्ने भन्दै नेता कार्यकर्तालाई यसमा लाग्न निर्देशन पनि दिए ।

नेपाली कांग्रेसका पूर्वमहामन्त्री एवम् बिपी पुत्र शशांक कोइरालाले पार्टीमा युवापुस्ताको सहभागीताको खाँचो रहेको बताए । देशमा भएका सबै जसो विकासमा कांग्रेसको ठूलो योगदान रहेको बताउँदै कोइरालाले युवाहरु विदेश गएर होइन, स्वदेशमै काम गरेर देश विकास गर्नुपर्ने बताए । नेपाली काग्रेस नेता केन्द्रित भएको र कम आवसर पाएको भन्दै युवा विदेश पलायन रोक्न काग्रेसका भूमिका अपरिहार्य रहेको बताए । बिपीले देखाएको त्यागलाई हामीले भुल्नु नहुने भन्दै कोइरालाले काग्रेसमा एकाताको भावना अझै जरुरी रहेको बताए ।
कांग्रेस काभ्रेका सभापति तिर्थ लामाले कांग्रेस अब सबै सधैं सँगै मिलेर जाने भन्दै बिपी कोइरालाको शालिक निर्माण गर्दाका समस्या र अहिलेको अवस्थामा आइपुग्दासम्मका घटनाक्रमहरुका बारेमा जानकारी दिए ।

कार्यक्रममा केन्द्रिय सदस्यहरु शिव प्रसाद हुमागाई,मधु आचार्य,मोहनबहादुर बस्नेत गणेशलामा,कञ्चनचन्द्र वादेलगायतले वीपी राजमार्गले पुर्याएको फाइदाका विषयमा चर्चा गरेका थिए ।

२०७१ सालमा शिलान्यास गरिएको ९ वर्ष पछि सालिकले पूर्णता पाएको हो । कुल १५ लाख रुपैयाँ लागतमा सालिक निर्माण गरिएको प्रतिमा निर्माण मूल समितिका संयोजक जितकृष्ण धिनान्जु श्रेष्ठले जानकारी दिए । प्रथम जननिर्वाचित प्रधानमन्त्री विश्वेश्वर प्रसाद (वी.पी.) कोइरालाको परिकल्पनामा वि.सं २०१६ सालमा शुरुवात भएको यस सडक निर्माण प्रधानमन्त्री कोइराला अपदस्थ गरी २०१७ सालमा पञ्चायती व्यवस्था लागू भएपछि सफल हुन सकेको थिएन ।

यसै सन्दर्भमा, वी.पी.को परिकल्पना र उहाँकै नाम रहेको राजमार्ग (वी.पी. राजमार्ग) को सुरुवाती विन्दु धुलिखेलमा वी.पी. कोइरालाको प्रतिमा स्थापना गर्नु वाञ्छनीय ठानेर वी.पी. कोइराला प्रतिमा, निर्माण समिति’ र नेपाली कांग्रेस धुलिखेल नगर समितिको अग्रसरतामा धुलिखेल नगरपालिका वडा नं ६, जरणडाँडास्थित हस्पिटल चोकमा प्रतिमा स्थापना गरिएको नेपाली कांग्रेस काभ्रेका सचिव माधब ढकालले जानकारी दिए ।