काठमाडौं
पुराना सम्झौताहरु कार्यान्वयन सहित विद्यालय शिक्षा ऐन जारी गर्नुपर्ने माग सहित आज १५ औं दिन पनि देशभरका शिक्षकले राजधानीमा प्रदर्शन गरेका छन् ।
शिक्षकहरुको आन्दोलनमा सहभागिताको विषयलाई लिएर काभ्रेपलाञ्चोक जिल्लाका प्रधानाध्यापकहरुको उपस्थितिमा आज(बुधबार)छलफल कार्यक्रम सम्पन्न भएको छ । काठमाडौंको बानेश्वर स्थित श्री रत्नराज्य माध्यमिक विद्यालयको सभाहलमा भएको कार्यक्रममा आन्दोलनको उपलब्धि, मोडालिटी तथा आगामी कार्यक्रमका विषयमा छलफल भएको थियो ।
कार्यक्रम नेपाल शिक्षक महासंघका अध्यक्ष लक्ष्मी किशोर सुवेदीको अध्यक्षतामा भएको थियो । कार्यक्रममा सुवेदीले सरकारका तर्फबाट ऐन जारी हुने विषयमा शंका उत्पन्न भएपछि बाध्यता पूर्वक आन्दोलन गर्नुपरेको बताए । उपलब्धि हासिल नभए सम्म आन्दोलन जारी रहने उनको भनाई थियो । आन्दोलन सशक्त बनाउनका लागि प्रधानाध्यापकहरुको विशेष भूमिका रहने भन्दै उनले आन्दोलनमा सक्रियता अझै बढाउनुपर्ने तर्क गरे ।
विद्यार्थीको पढाइएका विषयमा धेरै चिन्ता व्यक्त गर्नेहरुको संख्या बढेको भन्दै पुरानो शैक्षिकशत्रको अन्त्य र नयाँ शैक्षिक सत्रको सुरुवाती समय भएकोले कुनै शैक्षिक क्षति नभएको बताए । बाहिर हल्ला भएजस्तो अवस्था नभएको र यो सबै नयाँ शिक्षा ऐन र आन्दोलनका विपक्षमा भएकाहरुले फैलाएको अफावाह मात्रै भएको उल्लेख गरे ।
‘कोरना महामारीको समय होस या भूकम्प पछिको समय लामो अवधि शैक्षिक क्षति व्यहोर्दा पनि यति चिन्ता व्यक्त भएको थिएन । अहिले त्यति धेरै चिन्ता सुनियो । महासंघ विद्यार्थीको पढाइ प्रति जिम्मेवार छ । विद्यार्थीको पठन पाठनमा असर नपुर्योन विषयमा सचेत छौ । शिक्षा ऐन जारी गराउने सन्दर्भमा अभिभावक लगायत सबै चेतनशिल नागरिकको सहयोग जरुरी छ ।’ उनले भने ।
सुवेदीले महासंघ वार्ताको पक्षमा रहेको तर यस अघिको धोकाका कारण औचित्यहिन वार्ता नचाहेका बताए । मुख्य तीन ठूलादल सहितको वार्तामा महासंघ सहभागी बन्न समस्या नहुने उनले उनको भनाई थियो ।
उपलब्धी हासिल नभए सम्म आन्दोलन जारी रहने र त्यसका लागि सडकमा देशभरका शिक्षकहरुको संख्या अझै थपिने उनले दावी गरे । कार्यक्रममा नेपाल राष्ट्रिय शिक्षक संगठन राष्ट्रिय समिति उपमहासचिव राम प्रसाद ढकाल, एकीकृत अखिल नेपाल शिक्षक संगठनका अध्यक्ष शंकर अधिकारी, शिक्षक संघ केन्द्रीय अध्यक्ष सोमनाथ गिरी, नेपाल राष्ट्रिय शिक्षक संगठन राष्ट्रिय समिति सदस्य सुभद्रा अधिकारी, काभ्रे जिल्ला अध्यक्ष भीमसेन हुमागाई, एकीकृत अखिल नेपाल शिक्षक संगठन केन्द्रीय सदस्य पद्म तिमल्सिना, काभ्रे अध्यक्ष चेत बहादुर लामा, लगायत आन्दोलनमा सहभागी विभिन्न घटकका शिक्षक नेताहरुको उपस्थिति रहेको थियो ।
कार्यक्रमका सहभागीहरुले आन्दोलन अझै ससक्त बनाउनुपर्नेमा जोड दिएका थिए ।
नेपाल शिक्षक महासंघ आन्दोलन परिचालन समितिका संयोजक शम्भु प्रसाद घिमिरेको संयोजकत्वमा भएको उक्त कार्यक्रममा जिल्लाका सबै पालिकाका प्रधानाध्यापकहरुको उपस्थिति रहेको थियो ।
