सरकारको टिकटक बन्द गर्ने निर्णय प्रति यस्तो छ नेताहरुको अभिव्यक्ति

टिकटकमा गलत सामाग्री पोष्ट नगर्न गृहमन्त्रालयको विज्ञप्ति,सामाजिक संजाल दर्ता गराएर मात्र चलाउनका लागि निर्देशिका स्विकृत भए सँगै सोमबार बसेको मन्त्रिपरिषद्को बैठकले एक्कासी नेपालमा टिकटक बन्द गर्ने निर्णय गर्यो ।

उक्त निर्णयका विषयमा मिश्रित प्रतिकृयाहरु सार्वजानिक भइरहेका छन् । टिकटकलाई प्रचार प्रसारको माध्यम बनाएर व्यपार व्यवसाय संचालन गर्नेरुहरुले आफ्नो व्यपारमाथि आक्रमण भएको आरोप लगाएका छन् भने टिकटकको माध्यमबाट विभिन्न शैक्षिक तथा चेतनामूलक सामग्री मार्फत सकारात्मक सन्देश प्रवाह भएपनि सरकारले विना अध्ययन बन्द गराएको धेरैले दुःखेसो पोखेका छन् ।

केहीले भने टिकटकले सामाजिक सद्भाव विगारेको र अश्लिलतालाई प्रसय दिएको भन्दै बन्द गर्नु नै उपयुुक्त भएको राय व्यक्त गरेका छन् ।
यस प्रकारका मिश्रित प्रतिकृयाहरु सार्वजानिक भइरहेका बेला राजनीतिक दलका नेताहरुले सामाजिक संजाल मार्फत प्रकट गरेका अभिव्यक्तिलाई यहाँ प्रस्तुत गरिएको छ ।

पूर्वप्रधानमन्त्री के.पी शर्मा ओलीले गाईतिहारको पूजा गरेको भिडियो पोष्ट गर्दै उक्त सुन्दर भिडियो टिकटकमा भेटेको भन्दै गाई तिहारको शुभकामना दिएका छन् । उनको उक्त पोष्टले टिकटक चल्नुपर्ने धारणा व्यक्त गरेको बुझिन्छ ।

त्यसैगरी कांग्रेस नेता गगन थापाले टिकटक बन्द गर्ने निर्णय गरेर सरकार उल्टो कदम हिँडेको टिप्पणी गरेका छन् । सामाजिक संजाल दुरुपयोग गर्नेलाई निरुत्साहित गर्न नियमन आवश्यक छ तर सामाजिक संजाल नियमन गर्ने नाममा बन्द गरिनु सरासर गलत भएको साथै यसमा सरकारको नियत अभिव्यक्ति तथा व्यैक्तिक स्वतन्त्रता कुण्ठित गर्ने देखिएको भन्दै कदम सच्याउनुपर्ने तर्क व्यक्त गरेका थिए ।
राष्ट्रिय स्वतन्त्र पार्टीका अध्यक्ष रविलामिछानेले सामाजिक संजाल नियमन गर्ने हो, बन्द गर्ने होइन ।

समस्या कन्टेन्टको हो, प्लेटफर्मको होइन । अराजकता अभिव्यक्तिमा होला, माध्यमको के दोष ? टिकटकका कयौं युजर र कन्टेन्ट खराब छैनन् । प्रविधिक रुपमा खराबलाई कन्ट्रोल गर्न सकिन्छ । टिकटकमा हालेको भिडियो रिलमा हाल्न मिल्छ, इन्स्टामा हाल्न मिल्छ, फेसबुकमा हाल्न मिल्छ । के सबै प्लेटर्फम बन्द गर्दै जाने हो भन्दै आजको युग उत्कृष्ट सुधारिएको अनुशासित सामाजिक संजालको युग भएको उनले जानकारी गराएका छन् । साथै सत्ताधारी दलकै जिम्मेवार पदाधिकारीहरुको बिरोधको अर्थ नबुझेको भन्दै के यो निर्णय माओवादी केन्द्रको मात्रै हो भनी प्रश्न गरेका छन् ?

राप्रपा नेपाल अध्यक्ष कमल थापाले टिकटक बन्द गर्ने सरकारको निर्णय गलत, प्रतिगामी र सर्वसत्तावादी सोचको उपज भएको र निर्णय तत्काल फिर्ता लिनु पर्ने भनेका छन् । टिकटकले सूचना र ज्ञानको सम्प्रेषणका साथै जनसाधारणको असिमित लुकेको प्रतिभा प्रस्तुत गर्ने अवसर दिएकोले नियमन गर्नुुपर्ने तर बन्द गर्नु नहुने विचार राखेका छन् ।

पूर्व संचार मन्त्री समेत रहेका एमाले नेता गोकुल बास्कोटाले स्वस्थ व्यक्तिगत मनोरन्जन श्रृजनात्मक काम गर्न पाउने क्न्टेन्ट फिल्टर गर्ने कानुन बनाएर नेपालको आर्थिक कानुन मान्ने बनाएको भए हुन्थ्यो भन्दै आफ्नो पालामा सामाजिक संजाल नियमनका लागि गरिएको प्रयासलाई इंकित गर्दै बन्दै गरिदिँदा गगन–विश्व र प्रचण्डलाई लोकतन्त्र खतरामा परेको नलागेमा आपत्ति रहेन भन्दै व्ययङ्ग्य गरेका छन् ।

उता काठमाडौं महानगरपालिकाका मेयर बालेन शाहले आफ्नो नामको फेक आइडीमा राखेका गलत सामग्रीका कारण दुःख पाउँदा पटक पटक आइडी बन्द गर्न टिकटकमा अनुरोध गर्दा, साइबर व्युरोमा अनि नेपाल दुरसंचार प्राधिकरण जाँदा समेत उपचार नपाएको प्रसंग उल्लेख गर्दै टिकटक नै बन्द गराउनु समाधान नभएको भनेका छन् ।

विकृति भित्र्याएको मात्र नभएर बजारीकरण, प्रतिभा प्रस्फुटन नेपाली गित संगितलाइ अन्तरराष्ट्रियकरण गर्न पनि मद्धत पुगेको भन्दै बन्द समाधान नभएको र टिकटकलाई नियमन गरि पुनः संचालन गर्नुपर्ने बताएका छन् ।

त्यसैगरी एमाले नेता महेश बस्नेतले नेपालमा टिकटक व्याण्ड गर्ने सरकारको निर्णयलाई स्वागतयोग्य भनेका छन् । साथै उनले अन्य सामाजिक संजाल र युट्युब पनि तत्काल नियमन गरोस । यो माध्यमबाट अपराध गरिरहेकाहरुलाई कारबाहीको दायरामा ल्याओस भनेका छन् ।

उता धरानका मेयर हर्क सम्पाङले सरकारलाई अनुप्रास मिल्दो शब्द प्रयोग गर्दै टिकटक बन्दको विरोध गरेका छन् ।
दलका नेताहरुले व्यक्त गरेको विचार अनुुसार लोकतान्त्रिक शासन पद्धतियुक्त मुलुकमा नियम अनुशासनमा रही अभिव्यक्ति प्रस्तुत गर्ने स्वतन्त्रता सबैलाई रहन्छ गलत प्रबृत्तिको नियमन गर्नुपर्छ तर प्लेटफर्म नै बन्द गर्नु उपयुक्त नहुने देखिन्छ ।